IMPROMAXÍN: COMPETICIÓN TEATRAL
Dez improvisadoras compiten por ser a primeira campiona de improvisación no Carballiño
Convidámosvos a sistir á primeira edición do IMPROMAXÍN, unha competición de improvisación que a AC Fetega e CouMedia organizan no Carballiño. Tamén chamada Impro Deportiva, o evento acolle no Auditorio Municipal do Carballiño un formato moi sinxelo no que os participantes se enfrontan sen outras ferramentas nin vestimentas que o seu maxín. Dez improvisadoras, unha presentadora, unha axudante, un técnico de son e un de luces. Así de limpo se presenta o escenario. E agora a competir: quen de todas elas será quen de se converter na campiona do I IMPROMAXÍN?
O público, peza fundamental.
Na impro, o público ten un papel moi relevante, fan aportacións á dramaturxia e ao desenvolvemento das escenas: escribindo frases en papeis que serven como título das improvisacións, decidindo que personaxes interveñen ou en que lugares suceden as historias. No ImproMaxín, o público tamén vota e decide quen é a improvisadora máis notable.
Outra forma de facer teatro.
A impro é outra forma de facer teatro. Escenas creadas de forma instantánea, sen texto escrito nin preparación previa, nas que os actores e as actrices interpretan a ficción no mesmo intre da súa creación. As improvisadoras fan propostas, toman decisións e poñen en xogo os recursos grupalmente, nunha creación colectiva única e irrepetible. Arte construído no momento, a partir dos impulsos e ideas das participantes, e das suxerencias do público. A impro abre portas, prende o maxín, transita insólitos lugares, estimula a creatividade e a comunicación.
Historia da impro
A improvisación remóntase aos propios inicios do teatro, pero é probablemente na Commedia dell ́Arte, onde a técnica da impro moderna se asenta. Os precursores da técnica no século XX foron Viola Spoilin e Keith Johnstone, que sentaron as bases desta nova arte. A partir de ahí xurdiron formatos coma o Match en Canadá nos 70 ou o Catch en Francia nos 80, así coma outras modalidades de xogos non competitivas e espectáculos completos denominados long forms. En España e Latinoamérica foi nos 90 cando aparecen compañías de referencia coma Sucesos Argentinos, Imprebís, ImproMadrid ou Planeta Impro. En Galicia ata 2011 non xurden compañías coma TheMomento en Compostela, Los Duguis na Coruña ou Triatreros en Vigo, e comezan a producirse encontros na capital galega coma o Campionato ImproFighters ou o Festival Imperdible. Na actualidade existen moitos grupos practicando esta disciplina escénica que mantén unha actividade aínda soterrada, relegada na maioría dos casos a bares e centros culturais. É un bó momento para poñer en valor esta potente arte da espontaneidade e conectar Galicia cun movemento mundial que non para de crecer.
Unha actividade FETEGA e CouMedia
Este ano a Asociación FETEGA quere darlle impulso e visibilidade á improvisación teatral, unha arte escénica emerxente, con moito éxito e seguimento entre a mocidade. De que xeito? Poñendo en marcha, coa colaboración de CouMedia, marca do actor e cómplice necesario, Antón Coucheiro, a primeira edición da IMPROMAXÍN. Xunto con eles, compañías de impro e institucións prenden a mecha dun novo Festival con espíritu de cubrir toda Galiza.
ORGANIZADORES DE IMPROMAXIN
PATROCINADOR
COLABORADOR
